ငွေကြေး မတတ်နိုင်သည့် လူနာများကို ဆေးကုမပေးပါကဝန်ကြီးဌာနသို့တိုင်ကြားနိုင်ပြီ

အစိုးရကျန်းမာရေး ဆေးရုံများတွင် တာဝန်ရှိသူ ဝန်ထမ်းများအနေဖြင့် အခကြေးငွေမတတ်နိုင်သည့် လူနာ များကို ဆေးကုသမှုမပေးခြင်း၊ ဆက် ဆံရေး မပြေပြစ်ခြင်း ရှိပါကကျန်းမာရေးဦးစီးဌာနသို့ တိုင်ကြားနိုင်ပြီး အရေး ယူပေးမည်ဟု ကျန်းမာရေးဦးစီးဌာနမှတာဝန်ရှိသူ တစ်ဦးက ပြောသည်။

ကျန်းမာရေးဦးစီးဌာနက ကျန်းမာရေးဝန်ထမ်းတွေကို လူနာတွေကို မခြေမငံ မဆက်ဆံဖို့၊ လူနာတွေဘက် ကနေ ဆက်ဆံလာရင်တောင် သည်းခံ ဖို့ ကောင်းကောင်း မွန်မွန်ဆက်ဆံဖို့အတိအလင်း ညွှန်ကြားထား ပါတယ်။ ငွေကြေးလုံးဝ မတတ်နိုင်တဲ့ လူနာတွေ ဆေးရုံလာတက်တဲ့ဆေးရုံကနေ ဆေးမကုပေးဘူး ဆိုပြီး နှင်ထုတ်လို့ မရပါဘူး”ဟုကျန်မာရေးဦးစီးဌာန၏ ညွှန်ကြားရေးမှူးချုပ် ဒေါက်တာမင်းသန်းညွှန့် က မြန်မာတိုင်း(မ်)ကို ပြောသည်။

Loading...

ပြီးခဲ့သည့်လတွင် ဖြစ်ပွားခဲ့သည့် မြောင်းမြ ဆေးရုံမှ ဆေးမကုသပေးသဖြင့် မိမိကိုယ် မိမိဆုံးစီရင်သွားခဲ့ သည်ဆိုသည့် ဖြစ်စဉ်ကို ကျန်းမာရေးဝန်ကြီးဌာနမှ စုံစမ်းစစ်ဆေးရာတွင်အဆိုပါလူနာသည် ဆေးရုံနှင့် ပတ်သက်မှုရှိသည်ကို အထင်အရှားမတွေ့ ကြောင်းကျန်းမာရေးဝန်ကြီးဌာနက ထုတ်ပြန်ခဲ့သည်။

သို့သော် ကျန်းမာရေးဝန်ကြီးဌာနမှ ကျင့်ဝတ်များကို ကျုးလွန်သူများရှိပါက တာဝန်မှ ရပ်စဲခြင်း၊ သတိပေးခြင်း ပြုလုပ်မည် ဖြစ်ပြီး ယခင်ကတည်းက ထိုကဲ့သို့ အရေးယူခဲ့ဖူးကြောင်းဒေါက်တာ မင်းသန်းညွှန့်က ပြောသည်။

လက်ရှိတွင် ကျန်းမာရေးဝန်ကြီးဌာနမှ ချမှတ်ထားသည့် မူဝါဒများအရ စရိတ်မျှပေးစနစ်နှင့်အစိုးရဆေး ရုံတိုင်း မွေးလူနာ မီးဖွားခြင်း၊ ငါးနှစ်အောက် ကလေးများနှင့် အရေးပေါ်ခွဲစိတ်လူနာများကို အခမဲ့ဆေးဝါး ကုသပေးရမည် ဖြစ်သည်။

“အခုဆိုရင် ကျန်းမာရေးဝန်ကြီးဌာနက ကျန်းမာရေးစောင့်ရှောက်မှုပေးဖို့ ဆေးရုံအဆောက်အအုံရယ်၊ ဆေး ရုံဝန်ထမ်းများကို ခန့်ထားတဲ့အပြင် ဆေးဝါးတွေကိုပါ ထောက်ပံ့ပေးထားပါတယ်။ပြီးတော့ ဆေးရုံတိုင်းမှာ လည်း ဆေးပဒေသာပင်ဆိုပြီး ရန်ပုံငွေ ပေးထားတာလည်း ရှိပါတယ်။အဲဒီပိုက်ဆံရဲ့ အတိုးနဲ့လည်း ငွေကြေး မတတ်နိုင်တဲ့ လူနာတွေကို ကုပေးလို့ရပါတယ်” ဟုဒေါက်တာ မင်းသန်းညွှန်က ပြောသည်။သို့သော် ငွေကြေးတတ်နိုင်သည့် လူနာများအနေဖြင့် လိုအပ်သည့် ဆေးဝါးများကိုဝယ်ယူသုံးစွဲရမည် ဖြစ် သည်။

ကျန်းမာရေးအသုံးစရိတ် တိုးမြင့်လာသည့်အတွက် လူနာများကျန်းမာရေးကုန်ကျ စရိတ်ကိုသက်သာ လာစေသော်လည်း အစိုးရဆေးရုံများ၌ ဆေးရုံဝန်ထမ်းများ၏ ဝန်ဆောင်မှုမှာလိုအပ်ချက်များစွာ ရှိနေသေးကြောင်း ဒေါက်တာ မင်းသန်းညွှန့်က ပြောသည်။

“အစိုးရဆေးရုံတိုင်းမှာ ဆေးရုံဝန်ထမ်း ရှားပါးတဲ့အတွက် သူတို့တွေမှာ အလုပ်ဝန် အရမ်းပိနေပါတယ်။ ခုတင် ၁၀၀ ရှိတဲ့ဆေးရုံဆိုရင် အမြဲ ခုတင် ၆၀ လောက်လူနာရှိနေတော့ ဝန်ထမ်းအင်အား က မနိုင်ပါဘူး။ ဒါကြောင့် သူတို့ တွေက လူနာကို ကောင်းကောင်းမွန်မွန်မဆက်ဆံပေးနိုင်ဘူး” ဟု ဒေါက်တာမင်းသန်းညွှန့်က ပြောသည်။